Hiep hiep hoeraaaaaa !

Om het 1 jarig bestaan van deze blog te vieren, een special post : (vertaling volgt)

Oe es dad ier ollemaolle begun'n ?

Awel van up twerk an ze gezeid voe den ie ce tee een bitje bie toedn. Voeral de web twjee toepssingn kendek nog niet zo goe. Dus gingek noa nen studiedag rond blogs en wiki's, RSS en ol zukken trukken... Gezien dat een praktische bieskolinge wa, moestek ton wok nen kjir nen blog activeern. Ken a gin goeste voe lik ol dandere nog nen kjir nen blog ut te vinden me van die saaie skoolvertelsels... Den lesgever (Tom Wambeke) stelde vworren voe nen obbie te pakkn, en gezien dak ol een paor joar an t lwoppn wa bie den club, eit ie den deen gaktiveerd. En azwo waak vertrokkn !

Minnen jisten post wa geweun minzelven vworrenstelln en azwo, vrjid saai dus.. En omdak gin last ginge èn me pottenkikkers èk den dag derachter beslist van tint westvloams te zettn.... kpeisde ton nog dak last ging èn me tupgeevn van min privacy... Enfin, stillekesan begost er toch een twaasen een twiene dienen blog te kennen. En de mjiste kosten dad ier toch moa moeilik leezn.. Zelfs Westvloamingn zeidn dat lastig wa.. 't Toppunt wa da minnen eigen vint zeit da tem tliever in tskwon vloams wilde leezn... Tja... Wuk ton ? Stillekes geprobeerd van - nog alsans redelik anoniem- in t Nederlands te skrivvn... De reacties ut min omgevinge vieln mee en kè der mee vwort gedoan.

Intussn èk wok veel andere blogs bekeekn en es de goeste voe 't lwoppen zelfs der up vworut gegoan. In plekke van 1 wedstrid per jaar, goak nu ol an vuvve zitten, min kilometers zin der wok nie up geminderd en k benne zelfs ol nie mjer anoniem.

Merci voer ol de commentaorkes dak ier krigge, tes olsans gjistig voe te zien dat er nog met 't zelfste bezig zin !

Beknopte vertaling :

Het begin was een bijscholing op 't werk (web 2.0 toepassingen), waar we een eigen blog moesten starten. 't Werd dus een privé loopblog. Om geen last te hebben van gebrek aan privacy dus eerst anoniem en in 't Westvlaams. Later, op verzoek, in 't Nederlands. Intussen is mijn loopkilometriekske de hoogte in gegaan, neem ik aan 5 keer zoveel wedstrijden deel, en geniet ik van 't lopen en van het lezen van blogskes. Merci voor de commentaar het voorbije jaar ! Altijd leuk om te lezen !