woensdag 29 november 2006

nen vrijen voornoene

Vanuchtend de sjanse gehad van een paar eurkes vrie te èn : gin (betaald) werk, gin joengens (dedie moestn in skole zin). In vworbereidinge voer Deerlijk, de kerstcorrida, ton moa nen kjir nen krak forcee gedoan en een eurenalf gelwoppn. Hoeveel kilometers dak der juste deure gedraaid è, wit ik nie, maor 't zal ter nie verre van zin. Voe diegene van de streke : gestart in Wevelgem, langsent mollegat, over bissegem brugge nao marke, langst fietsroutepad (22, 7 en nog een poar) tot up Marke platse, ton al achtern langs delabies naor de preshoek, onder de brugge en ton berg up nao Lauwe, onder den tunnel, langsent ter biest noa Wevelgem were.
kpzeize zwon 14 kilomèters, mao tstikt up gin jin !
Min vintje at voe mie een paar mp3tjes grjid gezet up da spul van den aldi (dad ier ol 3 jaor in oes kasse ligt). 't wa den jisten kjir dak me zukken spellement up minne kop liepe. En gjistig voe de muziek, moar tpast toch nie echt perfect zulle : da jinnen woorke viel da reekans ut. of dat an de anatomie van min oren ligt of an da spel, ken è der gin gedacht van. Enfin, ton moa me jin oorke vwort gelwoppn. tging wok.
Miskiens nen tip voer jin of ander kerstcadootje : goeie workes voe da spel. t skint dat er azwo van die skelpn bestoan, die alsans passen ?
Moest ek meelwoppn me nen marathong, tzoet de moeite zin voe nen kjir tinvesteern, moar voe een bikke te joggn es da ol nie nwodig.
Enfin, da spul dus in min oren en up tempo geloopn : stairway to heaven at bergup gink, the forrest in t bos : twa lik dat em wiste woa dak ginge lwoppn ! (nie van wei, ollemaole pure buzze). tWas een experimentje me cdkes dam me ier juste liggn an. Jat zin beste gedoan voe da spel een bikke te stoffeern, moa juste de latste kilomèter begoste kik were tzelfste te worn : juste nie rap genoeg gelwoppn zkers ? ak nog nen kjir dienen toer lwoppe, en diezelfste muzik stoat der nog up, zoe ne kjir keun probeern voe gin 2 kjirs tzelfste te moetn oren ! speed it up girl !

5 opmerkingen:

Anoniem zei

Amain jogginggirl, dadè een skoan toerke zunne , kenne die streke van butten (mollegat, bissegem, lauwe, ter biest, ...)
get gie da vrjè goe gedaon, meiske !
Up uwe mp3 was 't voorzekerst van "your simply the best " aje toekwam ...
nen tip : voe den afstand te meten moeje ne kjer surfen naore diene sait : http://www.gmap-pedometer.com/

Jogginggirl zei

at frank spencer : es diene link serieus bedoeld of eij mie liggen het ? up tjiste zicht zittek in amerika ????

en nog een addendum : de pilln van de spelerke zin verre plat :)
(pillen zin wok aldi "bucht")

Anoniem zei

Peutverdekke, K'aaim vreee lang in Gent gewerkt, maar om dit te volgen moet ik toch moeite doen. Best plezant.

Anoniem zei

Moa banink, ’t ès gjein kluchtje.
Ge moet gie moa skrollen met uw pilke noar Europa en toens dichter kommen tot aje an uw stroate stoat.
En toan zet je moa pilkes an iederen draai en je goat zien dat den kilomèiterik omhoage goat. Aje weere voar uw deure stoat stoptje en goa je weten hoeverre daje gelopen èt.
Probeer moa ne kjè !
Kzoe t’ u vanoavent utleggen, moa ken keune nie kommen …

Jogginggirl zei

yep, tes gelukt !
twas 15 kilomèters en een klakse, maor da kan wok an min onnauwkeurig uttjikkenen zin !
Aak in deerlik minnen tid van vleedn jaore wille skerper stelln, ton moek nog nende verappern ! kreken up joen zuster ! (en zie ip mie zeker ?)